کسی پر غلط تہمت لگانا ،گالیاں دینا اور دل آزاری کرنا کیسا ہے ؟

کیا فرماتے ہیں علمائے دین و مفتیان شرع متین اس مسئلہ میں کہ زید اور بکر دونوں حقیقی بھائی ہیں۔
زید کی لڑکی (نرگس فاطمہ) کا تعلق ایک لڑکے (طارق)سے تقریبا بارہ پندرہ سال سے تھا ان دونوں کے درمیان اتنی گہری دوستی ہو گئی کہ دونوں نے آپس میں یہ وعدہ ومعاہدہ کر لیا کہ ہم لوگ آپس میں شادی کریں گے کہیں دوسری جگہ شادی نہیں کریں گے۔ زید کی لڑکی مدرسۃ البنات میں پڑھتی تھی جب وہ عالمہ ہو گئی تو اس کا کہنا تھا کہ میں بھاگ کر شادی نہیں کروں گی ورنہ بہت بدنامی ہوگی کہ عالمہ ہو کر بھاگ کر شادی کی ہے۔ لیکن اس کا باپ زید کسی طرح بھی اس لڑکے سے شادی کرنے کے لیے تیار نہیں ہوا۔ انتظار کی گھڑیاں روز بروز تلخیوں کے ساتھ گزرتی گئیں زید کا بھائی بکر عالم دین ہے وہ پوری فیملی کے ساتھ باہر ایک مدرسے میں پڑھاتا تھا اسے جب جب اس لڑکی کی نازیبا حرکات و سکنات کے متعلق معلوم ہوتا تو اپنے چھوٹے بھائی زید کو بذریعہ فون تنبیہ کرتا۔ لیکن وہ ان کی باتوں کو سن کر ان سنی کر دیتا تھا۔ اور اس کی طرف کچھ بھی توجہ نہیں دیتا تھا۔ بکر جب مدرسے سے گھر آیا تو یہاں آنے کے بعد بھی کئی دنوں تک اس کے گھر جا کر تنہائی میں اسے سمجھایا پھر بھی کچھ اثر نہیں ہوا۔ بکر نے یہاں تک اس سے کہا کہ حالات بہت نازک ہیں اگر کہیں معاملہ خراب ہوا تو کافی بدنامی ہوگی اس لیے میرا مشورہ یہ ہے کہ اب پڑھائی بند کرو اور جتنا جلد ہو سکے کہیں شادی کر دو اس لیے کہ صورت حال کے پیش نظر درجہ عالیہ تک پڑھانا مناسب نہیں ہے۔ روز بروز حالات بد سے بد ہوتے جا رہے ہیں۔ جتنی ضرورت تھی اتنا پڑھ لی اس کا جواب اس نے یہ دیا کہ پڑھائی کیوں بند کروں میری بیٹی ایسا نہیں کرے گی تو انہوں نے کہا کہ کیا تمہاری بیٹی فرشتہ ہے؟ بکر نے حتی الامکان سمجھانے کی کوشش کی مختلف جگہوں کے حالات و واقعات سے روشناش کرایا لیکن اس نے اس کی نصیحتوں پر ذرہ برابر بھی عمل نہیں کیا جس کا نتیجہ یہ ہوا کہ جب اس کی لڑکی بالکل نا امید ہو گئی کہ میرا باپ اس لڑکے سے شادی نہیں کرے گا تو اس نے لڑکے کو فون کر کے بلایا رات کے سناٹے میں اپنے گھر سے فرار ہو گئی اور اس سے نکاح کر لی۔
یہ خبر پوری بستی میں پھیل گئی لوگ آپس میں چہ میگوئیاں کرنے لگے تو زید نے اپنی عزت پر پردہ ڈالنے کے لیے اپنے بھائی بکر کو ہی پھنسایا جنہوں نے زید کے ساتھ ہمدردی کی اور اسے ذلت سے بچانے کی بھرپور کوشش کی اسی پر جھوٹی تہمت لگائی کہ انہوں نے میری بیٹی کا نکاح تلوار کی نوک پر کروایا۔ یعنی نکاح ڈرا دھمکا کر کرایا گیا ہے۔
اتنا ہی نہیں زید نے بکر کو گندی گندی گالیاں دینا شروع کر دیا بکر جب کہ اس کا سگا بھائی ہے اس کے ساتھ ماں کا رشتہ جوڑ کر اپنی ہی مرحومہ ماں کو نہایت قبیح گالی دی اور کہا کہ یہ عالم نہیں بلکہ یہ تو سور ہے بکر نے اس کا یہ جملہ اپنے کان سے سنا ہے۔
اس واقعہ سے پیشتر زید نے اپنے بھائی بکر کو فاتحہ کے لیے اپنے گھر بلایا تھا بعد فاتحہ کہا کہ کھانا کھا لیجئے اس دن جو اس نے کھانا کھلایا تو اس کا احسان بھی جتانا شروع کر دیاکہ بھوکا مر رہا تھا تو میں نے کھانا کھلایا۔
اس کی کن کن حرکتوں کو میں بیان کروں؟
المختصر یہ کہ دل آزاری اس کا کام ہے گھر میں سبھی لوگ اس کے حرکتوں سے نالاں ہیں۔
لہذا حضور والا سے مؤدبانہ گزارش ہے کہ مذکورہ بالا تحریر کی روشنی میں زید کے لیے از روئے شرع کیا حکم ہے؟ جواب بہت ہی واضح اور باتفصیل عنایت فرمائیں تاکہ لوگوں کی سمجھ میں بآسانی آجائے۔