قبرستان کے اوپر سے راستہ بنانا یا سرکاری روڈ بنانا کیسا ہے ؟
قبرستان میں سڑک نکالنا اور گاڑیاں گزارنا سخت منع ہے اس میں قبور مسلمین کی توہین وبے ادبی ہے، جو لوگ قبرستان سے سڑک نکالنے پر بضد ہیں وہ مردوں کے دشمن، ظالم وجفار، مستحق قہر قہار وعذاب نار ہیں، ان پر لازم ہے کہ بارگاہ رب العزت میں توبہ صادقہ کرکے بری حرکتوں سے باز آئیں ورنہ مسلمان ان سے ہر طرح کا بائیکاٹ کریں اور قبرستان سے سڑک نہ نکل پانے کے سلسلے میں ہر ممکن کوشش کریں۔
حدیث شریف میں ہے:(۱) حضور اقدس صلی اللہ تعالی علیہ وسلم فرماتے ہیں: "لأن أمشی على جمرة أوسیف، أوأخصف نعلي برجلي، أحب إلى من أن أمشی علی قبر مسلم” البتہ چنگاری یا تلوار پر چلنا یا جوتا پاؤں سے گانٹھنا مجھے اس سے زیادہ پسند ہے کہ کسی مسلمان کی قبر پر چلوں۔(سنن ابن ماجۃ/ کتاب الجنائز/باب ما جاء في النھی عن المشي علی القبور والجلوس علیھا/۳٦٦/رقم الحديث:۱۵٦۷/بیروت، لبنان)(۲)حضرت عبد اللہ بن مسعود رضی اللہ تعالی عنہ فرماتے ہیں: "لأن اطاء علی جمرۃ أحب الی من أن أطاء علی قبر رجل مسلم”بے شک مجھے آگ پر پاؤں رکھنا زیادہ پیارا ہے کسی مسلمان شخص کی قبر پر پاؤں رکھنے سے۔(المعجم الکبیر للطبرانی/الجزء التاسع/۳۷۳/رقم الحدیث:۹٦۰۵/الناشر: مکتبۃ ابن تیمیۃ، القاھرۃ) (۳) انہی صحابی اجل سے کسی نے قبر پر پاؤں رکھنے کے بارے میں پوچھا تو آپ رضی اللہ تعالی عنہ نے فرمایا: "کما أکرہ أذی المؤمن فى حياته فانى أكره أذاه بعد موته "میں جس طرح مسلمان کی ایذا اس کی زندگی میں مکروہ جانتا ہوں یونہی بعد موت اس کی ایذا کو ناپسند کرتا ہوں۔(شرح الصدور بشرح حال الموتى والقبور/۳۰۰/باب تأذیه بسائر وجوه الأذى/مطبعة المدنى،القاهرة)
اعلی حضرت امام اہل سنت علیہ الرحمۃ والرضوان تحریر فرماتے ہیں: "قبور مسلمین پر چلنا جائز نہیں، بیٹھنا جائز نہیں، ان پر پاؤں رکھنا جائز نہیں۔ یہاں تک کہ ائمہ نے تصریح فرمائی کہ قبرستان میں جو نیا راستہ پیدا ہوا ہو اس میں چلنا حرام ہے”(فتاوی رضویہ قدیم، ج ۴، ص ۱۰۸/دار العلوم امجدیہ، آرام باغ روڈ کراچی)
حضور تاج الشریعہ علیہ الرحمۃ والرضوان سے اسی طرح کا سوال ہوا کہ”قبرستان میں رہنے کے لیے مکان بنانا کیسا ہے؟ اور اس میں بیت الخلاء کے گندے نالے بھی نکالے جارہے ہیں اور عام راستہ بھی اسی میں ہے جب کہ ہم نے اپنی زندگی میں دیکھا کہ قبرستان میں کوئی جگہ قبر سے خالی نہیں ہے اور جان بوجھ کر یہ کام کیا جارہا ہے اور دنیوی تمام کام مثلاً گاڑی، بیل حتی کہ ان کے کھانے کا چارہ بھی اس میں رکھتے ہیں جبکہ پکے سنی مسلمان ہیں۔ ایسے لوگوں کے لیے شریعت کا کیا حکم ہے؟ قرآن وحدیث کی روشنی میں جواب دیں۔ فقط۔ والسلام” آپ علیہ الرحمہ اس کے جواب میں تحریر فرماتے ہیں: ناجائز وحرام اور باقی امور مذکورہ بھی حرام اشد حرام اور اس کے مرتکب سخت گناہ گار مستوجب نار ہیں، توبہ کریں”(فتاوی تاج الشریعہ، ج ۴، ص ۵۰۵ تا ۵۰۶/ مرکز الدراسات الاسلامیہ جامعۃ الرضا متھرا پور بریلی شریف) والله تعالیٰ أعلم بالصواب
۴/جمادی الآخرہ ۱۴۴۷ھ مطابق ۲۶/نومبر ۲۰۲۵ء
الجواب صحیح
محمد نظام الدین قادری استاذ ومفتی دار العلوم علیمیہ جمدا شاہی بستی یوپی