وضو کے بعد منہ کو کپڑے سے صاف کرنا

وضو کے بعد منہ کو کپڑے سے صاف کرنا

کیا فرماتے ہیں علمائے کرام اس بارے میں کہ وضو کے بعد منہ کو کپڑے سے صاف کرنے کی وجہ سے ثواب میں کمی آجائے گی ؟ سائل حافظ رضوان لاہور الجواب بعون الملک الوھاب مذکورہ صورت میں وضو کے بعد چہرے کو کپڑے وغیرہ سے صاف کرنے سے ثواب میں کمی نہیں آتی ہاں بہتر یہ ہے کہ صاف کرتے وقت کچھ تری باقی رہے تو اس کی فضیلت بیان کی گئی ہے . اس مسئلہ کے متعلق حضرت امام احمد رضا خان رحمۃ اللہ علیہ تحریر فرماتے ہیں، کہ اللہ تعالیٰ ثواب عطا فرمائے گا وضو کا ثواب جاتا رہنا محض غلط ہے۔ ہاں بہتر ہے کہ بے ضرورت نہ پُونچھے، امراء و متکبرین کی طرح اُس کی عادت نہ ڈالے اور پُونچھے تو بے ضرورت بالکل خشک نہ کر لے قدرے نم باقی رہنے دے، حدیث میں آیا ہے کہ یہ پانی روزِ قیامت نیکیوں کے پلّے میں رکھا جائے گا(اسے ترمذی نے درمیانی طبقہ کے تابعی حضرت ابنِ شھاب زہری سے روایت کیا اور بزرگ طبقہ اور افضل درجہ کے تابعی حضرت سعید بن مسیّب رضی اللہ تعالیٰ عنہما سے تعلیقاً بیان کیا- (بحوالہ فتاویٰ رضویہ جلد1،صفحہ313- رضا فاؤنڈیشن لاہور) واللہ اعلم عزوجل و ر سولہ اعلم ﷺ کتبہ :ابو الخیر محمد تنویر عطاری مدنی