جو کہے مجھے شریعت سے کوئی مطلب نہیں اس کا کیا حکم ہے ؟ از مفتی جلال الدین احمد امجدی

جو کہے مجھے شریعت سے کوئی مطلب نہیں اس کا کیا حکم ہے ؟

کیا فرماتے ہیں مفتیان دین اس مسئلہ میں کہ زید کی بیٹی ہندہ کی شادی بکر کے لڑکے خالد کے ساتھ طے ہوئی،اورجب بکر بارات لے کر زید کے گھر آیا تو ساتھ میں ناچ گانا ویڈیو بھی لایا، وہابیوں کو لایا جس کو دیکھ کر مدرسے کے مدرس نے منع کیا اور نکاح پڑھنے سے انکار کیا اس پر زید نے کہا کہ میں نے وعدہ کر لیا ہے یہ تمام کام ہوگا چاہے آپ نکاح پڑھیں یا نہ پڑھیں۔اور زیدنے ایک دیوبندی سے اپنی بیٹی کا نکاح پڑھوایا تو ایسی صورت میں زید اور ہندہ کے گواہوں اور زید کے گھر کھانے پینے والوں کے بارے میں شریعت کا کیا حکم ہے؟ زید نے یہ بھی کہا کہ مجھ کو شریعت سے کوئی مطلب نہیں لہذا از روئے شرع زید پر کیا حکم نافذ ہوگا ؟بینوا وتوجروا جواب: لڑکی کے باپ زید کا اپنے گھر ناچ اور گانا وغیرہ کراناسخت گناہ اور دیوبندی جو اپنے کفریات قطعیہ کے سبب حسام الحرمین کے مطابق کافر و مرتد ہیں ان سے نکاح پڑھوانا سخت حرام اور اس کا یہ کہنا کفرہے کہ مجھ کو شریعت سے کوئی مطلب نہیں۔ لہذا اسے کلمہ پڑھا کر اعلانیہ توبہ اور استغفار کرایا جائے اور بیوی والا ہو تو اس کا نکاح کرایا جائے ، اگر وہ ایسا نہ کرے تو سب مسلمان اس کا بائیکاٹ کریں ۔ اللہ تعالی کا ارشاد ہے "واما ینسینک الشیطن فلا تقعد بعد الذکری مع القوم الظالمین ۔ (پارہ ۷ رکوع ۱۴) اور جن لوگوں نے یہ ساری باتیں جانتے ہوئے اس کے یہاں کھانا کھایا وہ توبہ کریں۔ واللہ تعالی اعلم ۔ کتبہ: مفتی جلال الدین احمد امجدی