درود و سلام | سرورِ اَبرار پر لاکھوں سلام احمدِ مختار پر لاکھوں سلام

درود و سلام

(طرز۔۔۔۔ مصطفاۓ ذات یکتا آپ ہیں )

سرورِ اَبرار پر لاکھوں سلام احمدِ مختار پر لاکھوں سلام

گیسوۓ واللیل پر تاباں درود والضحیٰ رخسار پر لاکھوں سلام

دیدۂِ مازاغ پر عرشی درود نرگسِ دیدار پر لاکھوں سلام

بحرِ ما اَوحیٰ پہ ہو بے حد درود موجۂِ اسرار پر لاکھوں سلام

اُس گلِ لولاک پر مشکیں درود جانِ لالہ زار پر لاکھوں سلام

جلوۂِ حسنِ ازل جو نور ہے اوّلیں شہکار پر لاکھوں سلام

مقطعِ نظمِ نبوت پر درود مطلعِ انوار پر لاکھوں سلام

جو نکلتا تھا ہزاروں سال پر نجمِ پردہ دار پر لاکھوں سلام

حسنِ کُنہِ ذات پر مخفی درود گوہرِ اظہار پر لاکھوں سلام

اس قدِ بے سایہ پر الطف درود قامتِ ضوبار پر لاکھوں سلام

انگلیوں سے نور کے چشمے بہیں ساقیِ انہار پر لاکھوں سلام

مہرِ یُوحیٰ ان کا نطقِ دل فروز طلعتِ گفتار پر لاکھوں سلام

رہ گزر بنتی ہے رشکِ گلستاں جاں فزا مہکار پر لاکھوں سلام

سیرتِ اعلیٰ پہ ہو احسن درود خوبیِ اطوار پر لاکھوں سلام

سر قلم کرتی رہی جو کفر کا خُلق کی تلوار پر لاکھوں سلام

جو بنی ان کی عطا سےشاخ ، تیغ اس کی قاہر دھار پر لاکھوں سلام

چل کر آئیں بارگاہِ ناز میں طاعتِ اشجار پر لاکھوں سلام

لے گئی جو دم میں تا عرشِ بریں اُن کی اُس رفتار پر لاکھوں سلام

جسکے آگےجھک گئےشاہوں کےتاج شوکتِ بیزار پر لاکھوں سلام

کرتے ہیں ان کو جو تسلیمِ نیاز کلمۂِ احجار پر لاکھوں سلام

ان کے اہلِ بیت پر اطہر درود حرمت اطہار پر لاکھوں سلام

امہاتِ اہلِ ایماں پر درود عِفّتِ کردار پر لاکھوں سلام

جس میں زہرا ہے کلی ،سبطین گل اُس حسیں گلزار پر لاکھوں سلام

کربلا کے سرخ پھولوں پر درود گلشنِ کرّار پر لاکھوں سلام

کُل صحابہ پر ہزاروں رحمتیں ان کے چاروں یار پر لاکھوں سلام

باغِ طیبہ کے گلوں پر بلکہ نیز خاک وخشت وخارپرلاکھوں سلام

مہبطِ خیرِ بشر ، ثور و حرا تابِ جبل و غار پر لاکھوں سلام

روضۂِ انور پہ ہو ہر دم درود گنبد و مینار پر لاکھوں سلام

انبیاء و اولیاء ، غوث و معین یعنی سب اخیار پر لاکھوں سلام

جان و دل سے ان پہ جو قربان ہے امتِ سرکار پر لاکھوں سلام

ہم نے جو سیفی ! پیا روزِ اَلَست بادۂِ اقرار پر لاکھوں سلام

سید شاکر حسین سیفی صدر شعبۂِ افتاء دارالعلوم محبوب سبحانی ۔۔۔۔۔۔۔ ممبئی ۔۔۔۔۔۔انڈیا ١١/محرم الحرام/١٤٤٥ھ۔۔۔30/7/2023