کھانے پینے کی چیزوں میں مکھی پڑھ جائے تو پھر کیا کرنا چاہیے ؟

کھانے پینے کی چیزوں میں مکھی پڑھ جائے تو پھر کیا کرنا چاہیے ؟

السلام علیکم و رحمۃ اللہ و برکاتہ.. کیا فرماتے ہیں علمائے دین اس مسئلہ کے بارے میں کہ کھانے پینے کی چیزوں میں مکھی پڑھ جائے تو پھر کیا کرنا چاہیے ؟ بحوالہ جواب عنایت فرمائیں ؟ (سائل حافظ ارسلان سرگودھا پاکستان) وعلیکم السلام و رحمۃ اللہ تعالیٰ و برکاتہ اَلْجَوَابُ بِعَوْنِ الْمَلِكِ الْوَھَّاب صورت مسئولہ میں اگر کھانے پینے کی اشیاءمیں مکھی پڑجائے تو حکم شرع یہ ہے کہ اسے ڈبودو(یعنی پوری کوغوطہ دے کر نکال کر پھینک دو کیونکہ حدیث شریف کے مطابق اس کے ایک پر میں بیماری ہوتی ہے، اور دوسرے پرمیں شفاء ہوتی ہے- حدیث شریف : قَالَ النَّبِيُّ صَلَّى اللَّهُ عَلَيْهِ وَسَلَّمَ : إِذَا وَقَعَ الذُّبَابُ فِي شَرَابِ أَحَدِكُمْ فَلْيَغْمِسْهُ ، ثُمَّ لِيَنْزِعْهُ فَإِنَّ فِي إِحْدَى جَنَاحَيْهِ دَاءً وَالْأُخْرَى شِفَاءً- نبی کریم صلی اللہ علیہ تعالٰی علیہ والہ وسلم نے فرمایا ، جب مکھی کسی کے پینے، یا کھانے کی چیز، میں پڑجائے تو اسے ڈبودو اور پھر نکال کر پھینک دو کیونکہ اس کے ایک پر میں بیماری ہے، اور اس کے دوسرے پر میں شفا ہوتی ہے- صحیح بخاری کتاب اس بیان میں کہ مخلوق کی پیدائش کیوں کرشروع ہوئی حدیث نمبر3320- ابوداؤد شریف جلد3حدیث3844- بہار شریعت حصہ16صفحہ373-کھانے کا بیان ۔ (مگر یہ حکم وجوبی نہیں ہے، لہذا اگر کسی کو طبعی طور پر کراہت ہو اور وہ ایسا نہ کرے تو گناہ گار نہیں ہوگا، لیکن افضل طریقہ یہی ہے جو حدیث مذکورہ میں بیان ہوا اسی پر عمل کیاجائے- واللہ اعلم عزوجل ورسولہ اعلم ﷺ کتبــــــــــــــــــــــہ : ابورضا قاری محمد عمران عطاری مدنی