مسلک اعلی حضرت کو نیا اور پانچواں مسلک کہنا؟

مسلک اعلی حضرت کو نیا اور پانچواں مسلک کہنا؟

کیا فرماتے ہیں علمائے دین اس مسںٔلہ میں کہ کچھ لوگ ہیں جو عقائد و خیالات اہلسنت کے رکھتے ہیں اور اعلی حضرت رضی اللہ تعالیٰ عنہ کی تعلیمات کو برحق جانتے ہیں ۔ لیکن مسلک اعلیٰ حضرت کہنا یا اس کا نعرہ لگانا ان کی سمجھ میں نہ ہو جیسے کہ کچھ لوگ کہتے ہیں کہ مسلک تو چار ہی ہیں یہ پانچواں کیوں ۔ تو ایسے لوگوں پر شرعاً کیا حکم ہے ؟ ساںٔل عبداللہ بہراںٔچ شریف الجواب بعون الملک الوھاب سائل نے گول مٹول سوال کیا ہے اسے چاہئےکہ “مسلک اعلی حضرت اس کی سمجھ میں نہ ہو” سے اس کی کیا مراد ہے واضح کرے۔ ہاں مسلک اعلی حضرت کو نیا اور پانچواں مسلک بتانا اعلی حضرت رضی اللہ تعالی عنہ سے حسد کی بناپر ہے اور حسد حرام و گناہ کبیرہ ہے جو حسد کرنے والوں کی نیکیوں کو اس طرح جلاتا ہے جیسے آگ لکڑی کو جلاتی ہے ۔ حدیث پاک میں ہے:” إِيَّاكُمْ وَالْحَسَدَ، فَإِنَّ الْحَسَدَ يَأْكُلُ الْحَسَنَاتِ كَمَا تَأْكُلُ النَّارُ الْحَطَبَ (ابو داؤد شریف ج٢ ص٣١٦ ) مسلک اعلی حضرت نیا مسلک نہیں ہے بلکہ یہ وہی مسلک ہے جو صحابہ و تابعین اور اولیاء کرام و اسلاف عظام کا تھا ۔ ہاں اس زمانے میں بہت سے باطل مذاھب والے اپنے کو انہیں اسلاف کرام کے مذہب پر بتاتے ہیں مثلاً دیوبندی ، مودودی وغیرہ کہ یہ بھی اپنے کو مسلک اہل سنت و مسلک احناف پر بتاتے ہیں انہیں سے امتیاز کے لئے مسلک اعلی حضرت بولا جاتا ہے۔ اگر کوئی اپنے کو مسلک اہل سنت و مسلک حنفی پر بتائے اور یہ نہ کہے کہ میں مسلک اعلی حضرت کا پابند ہوں تو ظاہر نہیں ہوگا کہ وہ سنی ہے یا بدمذہب ۔ لہذا اس زمانے میں مسلک اہل سنت کی پہچان مسلک اعلی حضرت سے ہوتی ہے مسلک کی نسبت اعلیٰ حضرت کی طرف اس مناسبت سے ہے کہ انہوں نے بزرگان دین کے مسلک کی ترجمانی کی ہے اور اس کی ترویج و اشاعت میں پوری زندگی گزاری ہے ۔ اللہ تعالیٰ اعتراض کرنے والوں کو سمجھ عطافرمائے ۔ ایساہی فتاوی فیض الرسول ج١ ص٤١٣و٤١٤کتاب الحظر والاباحۃ میں ہے ۔ واللہ تعالیٰ اعلم بالصواب۔ کتبــــــــہ محمد صدام حسین برکاتی فیضی میرانی صدر میرانی دار الافتاء وشیخ الحدیث جامعہ فیضان اشرف رئیس العلوم اشرف نگر کھمبات شریف گجرات انڈیا ٢١جمادی الثانی ١٤٤٣ھ