مزار پر جاکر اولاد کی دعا کرنا کیسا ہے؟
السلام علیکم! حضرات
سوال : کیا فرماتے ہیں علمائے کرام ومفتیان عظام اس مسئلہ کے بارے میں کہ لوگ جاتے ہیں مزاروں پر اولاد کے لیے دعا کرتے کہ میرے اولاد ہو جائے تو کیا ایسا دعاء کرنا کیسا ہے مزاروں پر جاکے ۔
اس کا جواب قرآن و حدیث کی روشنی میں دینگے تو مہربانی ہوگی حضرات
سائل محمد ارباز عالم نوری بہار ضلع کشن گنج انڈیا
وعلیکم السلام ورحمۃ اللہ وبرکاتہ
بسم اللہ الرحمن الرحیم
الجواب بعون الملک الوھاب اللھم ھدایۃ الحق والصواب:
صورت مسئولہ میں شریعت مطہرہ کی روشنی میں مزاروں پر جاکر اللہ عزوجل کے اولیاء کو مخاطب کرکے اولاد کے لئے دعاء کرنا، اپنی حاجت بیان کرنا اوران سے مددمانگناجائزہے۔اللہ عزوجل کے نیک بندوں سے مددمانگنے کے جوازپرقرآن واحادیث شاہد ہیں ۔اللہ عزوجل قرآن کریم میں ارشادفرماتاہے:﴿ اِنَّمَا وَلِیُّکُمُ اللہُ وَ رَسُوۡلُہٗ وَالَّذِیۡنَ اٰمَنُوا الَّذِیۡنَ یُقِیۡمُوۡنَ الصَّلٰوۃَ وَیُؤْتُوۡنَ الزَّکٰوۃَ وَہُمْ رٰکِعُوۡنَ ﴾ تر جمہ کنز الایمان ،یعنی اے مسلمانو! تمہار ا دوست نہیں مگر اللہ اور اس کا رسول اور ایمان والے کہ نماز قائم کرتےہیں، اور زکوۃ دیتے ہیں اور اللہ کے حضور جھکے ہوئے ہیں ۔
(پارہ ،٦ص،٢٢٦,سورۃ المائدۃ،آیت 55)
امام اہلسنت اعلی حضرت الشاہ احمدرضاخان علیہ رحمۃ الرحمن اس مضمون کی سترہ احادیث نقل کرنے کے بعدتحریرفرماتے ہیں، انصاف کی آنکھیں کہاں ہیں ؟ ذرا ایمان کی نگاہ سے دیکھیں یہ سولہ بلکہ سترہ حدیثیں کیسا صاف صاف واشگاف فرماتی ہیں کہ رسول اللہ صلی اللہ تعالی علیہ وسلم نے اپنے نیک امتیوں سے استعانت کرنے ان سے حاجتیں مانگنے، ان سے خیر واحسان کرنے کاحکم دیا کہ وہ تمھاری حاجتیں بکشادہ پیشانی روا کریں گے، ان سے مانگو تو رزق پاؤ گے،مرادیں پاؤ گے، ان کے دامن حمایت میں چین کرو گے ان کے سایہ عنایت میں عیش اٹھاؤ گے۔یارب! مگر استعانت اور کس چیز کانام ہے۔ اس سے بڑھ کر اور کیا صورت استعانت ہوگی، پھر حضرات اولیاء سے زیادہ کون سا امتی نیک ورحم دل ہوگا کہ ان سے استعانت شرک ٹھہرا کہ اس سے حاجتیں مانگنے کا حکم دیاجائے گا، الحمدللہ حق کا آفتاب بے پردہ وحجاب روشن ہوا۔“
(فتاوی رضویہ،جلد٢١،صفحہ٣١٧،رضافاؤنڈیشن،لاھور)
(وھکذا فتاوی رضویہ رضا فاؤنڈیشن لاھور ج،٢١ص،٣٠٣)
واللہ تعالی اعلم بالصواب
حضرت علامہ مولانا منظور عالم قادری
کتبـــــــــــــــــــــــــــــــــــــــــــــــــــــــــــہ
استاذ،دارالعلوم اہلسنت معین الاسلام چھتونہ مہراجگنج یوپی